The MJF gives the details of the riddle contest of Yōišta, one of the Fryāna, and Axtya. The tyrant Axtya threatened to destroy the city of Frašnvizārān (‘riddle-expounders’) and kill its inhabitants, unless someone were able to solve thirty-three questions (Pers. frašn) put forward by him. A young boy, Yōišta, answered correctly all the questions, and thus saved his city from destruction; and in his turn, he put forward three questions to Axtya. Being unable to solve them, he was slain in the end. In an Avesta passage, Yōišta asks Anāhitā to give him a favour, so that he may answer the ninety-nine questions of Axtya. There is no trace of the Avesta collection of the questions of Axtya; however the MJF gives us a weak trace of it.
The Pārsīg text in its original form or in Pāzand or Persian form is found in a large number of manuscripts, K20, K 26, L 15, M 52, J 3, R VIII.1B, R VIII.8, SP 33, D 49, etc. It has been edited and also translated into French, English, German, Persian, Armenian, and some other languages.
We give below the transcription and of the book.
pārsīg
I
ēn mādayān ī Jōšt ī Fryān farrox bavād ped yazdān kām (ayyārīh).
ēdōn gōbend kū: andar hān ē ka Axt ī jādūg abāg haft bēvar spāh ō šahr ī frašnvizārān šud, u-š drāyīd kū «šahr ī frašnvizārān pīlxvast bē kunam!» ud ka ō ānōh mad u-š mardōm xvāst kū-š dād freh az pānzdah sāl nē bavād, u-š frašn aziš pursīd. harv kē nē tuvān būd vizārdan, ā-š frāz grift ud bē ōzad.
pas andar hān šahr ī frašnvizārān mard-ē būd Mahrspend (Mārspend) nām, u-š ō Axt ī jādūg guft kū:
«šahr ī frašnvizārān pīlxvast mā kun, ud ēn mardōm ī abēvināh mā ōzan! cē andar ēn šahr ī frašnvizārān mard-ē ast Jōšt ī Fryān nām kē-š dād freh az pānzdah sāl nēst ud harv hān frašn ī tū az ōy pursē ā-t bē vizāred.»
pas Axt ī jādūg ō Jōšt ī Fryān peygām frēstīd kū:
«frāz ō dar ī man āy dā an sīh-u-se frašn az tō pursam! ud agar pesox nē dahē, ayāb gōbē kū nē dānam, ēg-it ped ham zamān bē ōzanam.»
Jōšt ī Fryān ō dar ī Axt ī jādūg āmad. ud az hān cōn Axt ī jādūg nasā ī mardōmān azēr ī vistarg dāšt andar nē šud. u-š ō Axt ī jādūg peygām frēstīd kū:
«ašmā nasā ī mardōmān azēr ī vistarg dāred. ka an andar āyum, amehrspendān pēš ī man hend, andar hān gyāg kū nasā ī mardōmān baved an andar āyum, ēg-um amehrspendān az panāhīh ī man abāz ēstend, ud pas hān frašn ī tū az man pursē an vizārdan nē tuvān.»
pas Axt ī jādūg framūd hān vistarg /ud jāmag/ abar dāštan, ud vistarg ī nōg āvurdan ud abgandan. u-š Jōšt ī Fryān rāy andar xvāst ud guft kū:
«bē āy, abar ēn vistarg ud bāliš bē nišīy, ud frašn ī-t pursam, rāst bē vizār!»
Jōšt ī Fryān guft kū:
«mar ī durvand sāstār, abar ēn bāliš nē nišīyum! cē andar ēn bāliš nasā ī mardōmān ast. ud abāg man yazdān ud amehrspendān hend, pānāgīh ī man hend, ud ka an abar ēn bāliš bē nišīyum, ēg-um mēnōgān az pānāgīh ī man abāz ēstend. pas frašnīhā ī tū az man pursē, an vizārdan nē-tuvān baved.»
pas Axt ī jādūg framūd hān bāliš abar dāštan, ud bāliš ī nōg āvurdan. Jōšt ī Fryān abar hān bāliš ī nōg nišast.
II
naxvist frašn Axt ī jādūg az Jōšt ī Fryān ēn pursīd kū:
«vahišt ī ped gētīg veh ayāb hān ī ped mēnōg?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē vahišt ī ped gētīg veh kū hān ī ped mēnōg. u-š nišān ēn kū harv kē ped gētīg kār ud kirbag nē kuned, ā-š ānōh ō frayād nē rased. u-t nišān ī didīgar ēn kū bē agar ped gētīg tis ī nē nēk kuneh, ēgiš ō vahišt ī veh nē raseh.»
Axt ī jādūg cōn ka-š hān soxan ašnūd, sturd bē būd ēstād, u-š ēdōn guft kū:
«anāgīh man, Axt ī jādūg, az tō Jōšt ī Fryān kē abar man cēr hē – cōn nēv mard abar nēvdum mard, ud nēv asp abar nēvdum asp, ud nēv gāv abar nēdum gāv, cōn asmān abar zamīg pādixšā hē – cē an ped ēn frašn nōhsad mogmard ōzad hend kē-šān and yazišn ī yazdān kird ēstād kū-šān and xvārdan ī parāhōm rāy hamāg tan zard būd ēstād. u-m nōh duxt ī spitāmān ōzad hend kē-šān dēn stāyēnīdan rāy abesar ī ped zarr ud murvārīd az dahebedān vindād. ka-m az avēšān pursīd, u-šān guft kū ‘vahišt ī ped mēnōg veh!’ man guft kū ‘ašmāh ēdōn veh sahed, hamēdōn veh kū ō hān ī vahišt ī veh šaved!’ u-m frāz grift u-m bē ōzad.»
duvum frašn ēn pursīd kū:
«cē hān tis az dām ī Ohrmazd kē ped kūn nišīyed bulanttar kū ped pāy ēsted?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān sag ast.»
siyum frašn ēn pursīd kū:
«cē hān tis az dām ī Ohrmazd kē raved ud gām nē nihed?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān vinjišk ast kē raved ud gām nē nihed.»
cahārum frašn ēn pursīd kū:
«cē hān tis az dām ī Ohrmazd kē dandān sruvēn, ud sruv gōštēn?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān xrōs xvānend murvag ī srōšahlā; ud ka vāng kuned, ā-š pedyārag az dām ī Ohrmazd abāz dāred.»
panzum frašn ēn pursīd kū:
«kōdak kārd veh ayāb andak xvarišn?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē kōdak kārd veh kū andak xvarišn. cē ped kōdak kārd barsum šāyed cīdan, ud andak xvarišn ō aškamb nē rased, ud agar rased vād hangēzed.»
šašum frašn ēn pursīd kū:
«cē hān ī purr, ud cē hān ī nēmpur, ud cē hān ī tuhīg kē hagriz purr nē baved?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān ī pur hangad ī tuvānīg ēdar, ud ka bē videred ruvān ahlav; hān ī nēmpurr škōh ī driyuš ī vadzīvišn ī ka bē mīred ruvān ahlav; ud hān ī tuhīg kē hagriz purr nē baved hān ī škōh ī vadzīvišn ī ka bē mīred ruvān durvand.»
hafum frašn ēn pursīd kū:
«cē hān tis ī mardōmān ped nihān kāmend kirdan u-š nihān kirdan nē šāyend?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān zarvān (zarmān) ast kē kas nihān kirdan nē tuvān. cē zarvān xvad pēdāg baved.»
haštum frašn ēn pursīd kū:
«kadām hān zīndag mardōm kē astvihād vēned mīred, u-š ēdōn kāmag kū abāz zīndag šaved (baved), ud did-iz astvihād vēned ud bē mīred u-š xvār sahed?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān mardōm ast kē yašt nē kird ēsted, ud parāhōm nē xvārd ēsted; ud didīgar kān mardōm kē ō gāh ī zanān mad ēsted u-š zan nē kird ēsted; ud sidīgar hān mardōm kē zīndagruvān nē yašt ēsted ud ahlavdād nē dād ēsted ud yazišn ī yazdān nē kird ēsted, u-š ahlavdād ō veh mardōm guft kū ‘daham’ ud nē dād ēstad, ud mīred u-š kāmag ōn kū abāz zīndag šaved. ud did-iz mīred ud astvihād vēned, u-š xvār sahed.»
nōhum frašn ēn pursīd kū:
«pīl ud asp ud uštar ud xar ud gāv ud gōspend ud zan ud sag ud xūg ud gurbag ped cand māh zāyend?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē pīl ped se sāl zāyed, ud asp ud uštar ud xar ped dvāzdah māh zāyend, ud gāv ud zan ped nōh māh zāyend, ud gōspend ped panz māh zāyed, ud sag ud xūk ped cahār māh zāyend, ud gurbag ped cahal rōz zāyed.»
dahum frašn ēn pursīd kū:
«mardōm kadām ped-rāmišndar ud āsāndar zīved?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē mardōm hān ped-rāmišndar ud āsāndar zīved ī abēbīmdar ud hunsand-xīrdar.»
yāzdahum frašn ēn pursīd kū:
«cē hān tis ī ped gētīg ō Ohrmazd ud amehrspendān humānāg ast?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē andar gētīg dahebed ō Ohrmazd humānāg ast; ud gyāg ī dahebedān humānāg ī rōšn garōdmān; ud pāyēnagān ī dahebedān humānāg ast ō amehrspendān; ud darbān ī andar dar humānāg ast ō hān stārag ī parvīz xvānend; ud abārīg mardōm ka xvēškār ud avistvār humānāg hend ō abārīg stārag ī xvardag ī ped asmān hend.»
dvāzdahum frašn ēn pursīd kū:
«xvarišn kadām xvaštar ud ped-mizagdar?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē xvarišn hān pedmizagdar ud xvaštar kē az dar ī frārōn-toxšāgīh handuxt ēsted, ud aziš abāg kār ud kirbag xvared ud dāred.»
sizdahum frašn ēn pursīd kū:
«ēk cē ud do cē ud sē cē ud cahār cē ud panz cē ud šaš cē ud haft cē ud ašt cē ud nōh cē ud dah cē?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē ēk xvaršēd ī veh kē hamāg gēhān rōšn dāred; ud do āvarišn ud barišn ī vēn; ud sē humat ud hūxt ud huvaršt; ud cahār āb ud zamīg ud urvar ud stōr; ud panz panzag ī veh; us šaš šaš gāh ī gāhāmbār; ud haft haft amehrspend; ud ašt āštīh ud hamīh veh; ud nōh nōh sūrāg ī ped tan ī mardōmān; ud dah dah angust ī ped dast ī mardōmān.»
III
vīst-u-siyum frašn ēn pursīd kū: «cē sarttar?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē nē ēdōn cōn tū handēšē, bē ēdōn cōn an dānam. ud tū ēdōn handēšē kū vafr sarttar ī abar kōf nišīyed ud hagriz xvaršēd aviš nē tābed. bē nē ēdōn cōn tū handēšē. cē durvand mard menišn sarttar; u-š nišān ēn kū tō Axt ī jādūg rāy brād-ē ast durvand, u-š zahr ped dil cand must-ē andar ēsted, tū nē ped xvaršēd ud nē ped ātaš vidāxtan nē tuvān, un an ka ped must gīram bē vidāzed.»
pas Axt ī jādūg framūd brādar ī xvēš āvurdan, ōzadan, ud zahr az dil bē stadan, nē ped xvaršēd ud nē ped ātaš vidāxtan nē tuvān būd, ud Jōšt ī Fryān andar must frāz grift u-š bē vidāxt.
vīst-u-cahārum frašn ēn pursīd kū: «cē garmdar?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē ahlav mard must garmdar; u-š nišān ēn kū hān ī tō brādar zahr nē ped xvaršēd ud nē ped ātaš nē tuvān būd vidāxtan, ud man ka ped must frāz grift bē vidāxt.»
vīst-u-panzum frašn ēn pursīd kū:
«frōd šaved cē veh, ud bē afsurd ēsted cē veh, ud kē bē mīred cē veh?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē kē frōd šaved āb veh, ud cē afsurd ēsted ātaš veh, ud kē bē mīred mar ī durvand sāstār ī cōn tū veh. cē ka āb frōd nē šaved, ud ātaš nē afsared, ud mar ī durvand sāstār ī cōn tū nē mīred, ēgiš hamāg gēhān purr az āb ud ātaš ud purr az mar ī durvand sāstār ī cōn tō hē, ud gēhān dāštan nē šāyed (tuvān).»
vīst-u-šašum frašn ēn pursīd kū:
«az kōf cē grāndar, ud az kārd ī pōlāvadēn cē tēzdar, ud az angubēn cē šīrēndar, ud az dumbag ī mēš cē carbdar, ud az rādān kē rāttar, ud az rāstān kē rāsttar?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē az kōf zūr ud anāst grāndar; ud az kārd ī pōlāvadēn uzvān ī mardōmān tēzdar; ud az angubēn pidar ud mādar rāy frazend ī rōzveh šīrēndar; ud az dumbag ī mēš Spendārmed zamīg rāy vārān carbdar; ud az rādān Tištar yazd rāttar; ud az rāstān Rašn ī rāst rāsttar kē ēc-iš kas āzarm nē, ud pārag nē stāned, ud xvadāy ud bannag rāy abāg ēk didīgar rāstīh dāred.»
vīst-u-haftum frašn ēn pursīd kū:
«pāy kadām nēktar ud nēkōgdar? cē vas pāy ī man dīd, ēgiš pāy hān nēkōgdar ud nēktar ī man dīd ī Hufrīh ī tō xvah ī man zan.»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē pāy ī āb nēkōgdar ud nēktar. u-t nišān ēn kū ānōh kū āb pāy nihed xvēd bē rōyed, ud ānōh kū Hufrīh pāy nihed hušk bē baved.»
vīst-u-aštum frašn ēn pursīd kū: «zanān vazurg rāmišn az cē?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē nē ēdōn cōn tū handēšē, bē ēdōn cōn an dānam kū tū ēdōn handēšē kū zanān vazurg rāmišn az peymōzan gōnag gōnag ud kadagbānūgīh ī sazāgvār ka-šān dārend; cē nē ēdōn, zanān vazurg rāmišn az būdan ī abāg šōy ī xvēš.»
Axt ī jādūg guft kū:
«drōv gōbed, u-t ped ēn frašn bē ōzanam. nūn bē āy dā bē ō nazdīg ī Hufrīh šavem, tō xvah ud man zan, u-š hagriz drōv nē guft ud nē gōbed, ud ped gōbišn ī ōy bē ēstem!»
Jōšt ī Fryān hamdādestān būd. ud Axt ī jādūg abāg Jōšt ī Fryān nazdīg ī Hufrīh šud hend, u-šān guft kū: «bē nišīy ēn frašn rāstīhā bē vizār!»
Jōšt ī Fryān guft kū:
«zanān vazurg rāmišn az peymōzan ī gōnag gōnag ud kadagbānūgīh ī sazāgvār dārend ayāb vazurg rāmišn az būdan ī abāg šōy ī xvēš?»
pas Hufrīh handēšīd kū:
«škeft-iz ō man mad az ēn mar ī durvand sāstār ī jādūg kē-m bē nē hiled dā bē ōzanād! cē agar drōv gōbum, ēg-um brādar bē ōzaned ud an durvand bē bavum. bē ēdōn veh kū rāst gōbum. cē agar drōv gōbum, xvad durvand bē bavum, ud dād ud dēn ud ēvēn bē višōbed. bē ka man ped rāstīh ōzaned, ahlavdar bē bavum. u-š cādur abar sar nihuft ud bē guft kū: «zanān vazurg rāmišn az peymōzan ī gōnag gōnag ud kadagbānūgīh ī sazāgvār; bē ka-šān gādan abāg nēst ped dard ud dušramīh. ud tis-iz rāmišn hān nēst bē dard ud dušxvārīh; ud ka-šān gādan abāg ast ēg-išān ped rāmišnīgdar bavend.»
pas Axt ī jādūg ka-š hān soxan ašnūd, xēšm grift, ud Hufrīh ped hamzamān bē ōzad. ruvān ī Hufrīh ped hamzamān ō garōdmān šud, u-š vāng kird kū:
«nēk an, dā nūn ahlav būd ham, ud nūn-z ahlavdar ham; bē anāg tū Axt ī jādūg, dā nūn durvand būd hē, ud nūn-z durvanttar hē!»
vīst-u-nōhum frašn ēn pursīd kū:
«cē hān ī pāy dah, ud sar si, ud cašm šaš, ud gōš šaš, ud dumb do, ud gund si, ud dast do, ud vēnīg si, ud sruv cahār, ud pušt si, ud hamāg gēhān zīvišn ud dārišn az ōy?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē az dēn ōn pēdāg kū ka pēšyār āyād, frašn pursend, nē ēvēn vizārdan!»
Axt ī jādūg guft kū:
«šav ud ped nazdīg gyāg bē nišīy, ud pēšyār bē kun ud zūd bē āy ud frašn rāst bē vidār! cē agar drōv gōbed, ayāb gōbed kū ‘nē dānum’, ēg-it ped hamzamān bē ōzanum!»
Jōšt ī Fryān bē šud, ud abar maγ bē nišast, u-š ped menišn handēšīd kū:
«škeft-iz ō man mad ēsted az ēn mar ī durvand sāstār kē nē hiled dā bē zanād! cē agar hān ī zīndag, ud cē agar hān ī murdag abāz zīndag baved, ēn frašn vizārdan nē tuvān hād!»
pas Ohrmazd ī xvadāy Neryōsang yazd ped-peygām ō Jōšt ī Fryān frēstīd, u-š guft kū:
«frašn pesox dah! cē ēn gāv ē-juxt ast ī abāg mard-ē kē kār ī varz kuned.»
Jōšt ī Fryān cōn hān vāng ašnūd ud ēgiš kas nē dīd, gumān būd. u-š ped menišn handēšīd kū:
«mā agar Ahrmen ud dēvān hend u-šān abāyist ud kāmag ēn kū man bē ōzanend; ud agar an ēn frašn hamgōnag pesox dahum, ēg-um hān mar ī durvand sāstār bē ōzaned!»
pas Neryōsang yazd ō nazdīg ī Jōšt ī Fryān āmad, u-š guft kū:
«mā tars! cē an ham Neryōsang yazd, ud ō tō mad ham, u-š guft Ohrmazd ī xvadāy kū ‘ēn frašn pesox dah, cē frašn gāv ē-juxt ast ī abāg mard-ē kē kār ī varz kuned’.»
Jōšt ī Fryān ka hān soxan ašnūd, ēg saxt ped-rāmišnīg būd. ped hamzamān ō nazdīg ī Axt ī jādūg šud ud guft kū:
«ē mar ī durvand sāstār, ēn frašn pesox ēn ast cē ēn gāv ē-juxt ast ī abāg mard-ē kē kār ī varz kuned.»
Axt ī jādūg ka-š hān soxan ašnūd ped hamzamān sturd bē būd ēstād, ud se rōz-šabān sturd būd ēstād. pas az sē rōz-šabān abāz ō uš āmad, ō Jōšt ī Fryān guft kū:
«farrox(īhā) tō, Jōšt ī Fryān, kē umēd ō Ohrmazd ī xvadāy kuned kē ped hamzamān ō pušt ud ayyārīh rased.»
sīhum frašn ēn pursīd kū: «asp kadām nēktar?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē asp ī gušn ī frahādag ud ped-gōhr nēk, ka-šān dārišn abāg aspān ī šāhīg šāyed nēktar.»
sīh-ud-ēk frašn ēn pursīd kū:
«cē hān ī hušk bē nē sōzed, ud cē hān ī xvēd bē sōzed?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē hān xāk ast ī ka hušk nē sōzed, ud pīh ast ī xvēd bē sōzed.»
sīh-ud-duvum frašn ēn pursīd kū: «pādixšā kadām veh?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē pādixšā hān nēktar ī āmurzīdārdar, ud xrad ud dānišn nēk, u-š jahišnayyārīh abāg.»
sīh-ud-siyum frašn ēn pursīd kū: «tō, Jōšt ī Fryān, rāy xvāstag cand ast?»
Jōšt ī Fryān guft kū:
«zīndagān ped škōh bāš, mar ī durvand sāstār, ud murdagān ō dušox ōft! cē man rāy xvāstag se ast: ēk hān ī xvaram, ud ēk hān ī peymōzam, ud ēk hān ī ō driyušān ud arzānīgān daham.»
IV
pas Jōšt ī Fryān guft kū:
«sīh-ud-sē frašn tō az man pursīd hend u-m hamāg rāstīhā vizārd hend. nūn an az tō sē frašn pursum, agar pesox nē dahē ped hamzamān bē ōzanum!»
Axt ī jādūg guft kū:
«purs dā vizārum!»
Jōšt ī Fryān guft kū:
«zamīg ē-dast tōhm arz cand?»
didīgar ēn pursīd kū:
«gāv-ē varzāg arz cand?»
ud sidīgar ēn pursīd kū:
«xvēdodah-ē kār ud kirbag arz cand?»
Axt ī jādūg nē dānist. u-š guft kū:
«ka pēšyār āyād, frašn pursend, nē ēvēn vizārdan.»
Jōšt ī Fryān guft kū:
«šav ud ped nazdīk gyāg bē nišīy, ud pēšyār bē kun, ud zūd bē āy, ud ēn sē frašn rāst bē vizār! cē agar gōbē kū ‘nē dānum’, ēg-it ped hamzamān bē ōzanum.»
Axt ī jādūg ped jādūgīh andar dušox dvārist, u-š ō Ahrmen drāyist kū:
«guzastag, zamīg ē-dast tōhm arz cand; didīgar kū gāv-ē varzāg arz cand; ud sidīgar kū xvēdodah kār ud kirbag arz cand?»
guzastag Ahrmen ō Axt ī jādūg drāyīd kū:
«an ēn frašnīhā ī tō pesox nē dānum kirdan. cē agar bē gōbum, dām ī man hamāg bērōn šaved abāg dēvān ud druzān ud perīgān; ud an tō dōsttar nē dārum kū dām ī xvēš. ēn frašnīhā ī tō az man pursīd hend agar-t pesox dahum, hamāg dām ī man agār bē baved, ud pedyārag tis-iz bē nē māned, az abar dām ī Ohrmazd ped kār āyed ud ped hamzamān ristāxēz ud tan ī pasēn baved. šav ud gardan pēš gīr mihrdruzīh rāy kē (mihr) kirdag dāred, ud ka zamān frāz mad vardēnīdan nē tuvān. cē gyāg ī tō dušox ud pādifrāh ī tō saxttar kū hamāg durvandān.»
Axt ī jādūg abar dvārist az dušox anumēd, ud ōš ōy rāy hamē āvurd dā pēš ī Jōšt ī Fryān. Axt ī jādūg ō Jōšt ī Fryān guft kū:
«farroxīhā tū, Jōšt ī Fryān, kē Ohrmazd ud amehrspendān abāg tō būd hend, u-t hān ī nē dānist, ā-šān ō tō bē guft. ud man, kē umēd bē ō Ahrmen ud dēvān ēstād, sē frašn az Ahrmen ud dēvān pursīd hend, u-šān ō man pesox nē dād.»
u-š pas Jōšt ī Fryān Axt ī jādūg ped hamzamān ped kārd ī barsumcīn ud ped nīrang ī dēnīg agār bē kird, ud druz andar tan ī ōy agār bē kird.
V
ēn mādayān kē peyvanned bavandagīhā bē xvāned, ud ped sar yaθā ahūvairyō-ē bē gōbed, ped ruvān ī ōy kirbag ēdōn baved cōn ka mār-ē ped nīrang ī abestāg bē ōzanend; anī ped ruvān ī ōy ēdōn baved cōn ka sē sāl yašt ī āb srūd gāhān yazed ud būd dastvar kē guft kū: «anī sāl-ē vināh ī ayazišnīh ō bun nē baved.»
frazaft ped drūd, šādīh ud rāmišn.
zad bavād Axt ī jādūg abāg hamāg dēvān ud druzān ud jādūgān ud perīgān!
Col. (M 51b)
frazaft frazāmēnīd ēn mādayān ī Jōšt ī Fryān abāg ēn Ardā Virāz andar rōz ī amurdad māh šahrever sāl šašsad ud aštdah pārsīg. man dēn bannag Rustahm ī Mihrābān ī Marzbān ī Jahišnayyār ī hērbed az dastnibēg ī hērbed Mihrpanāhag ī Srōšiyār ī Vēšābūr ī hērbed nibišt.
ped yazdān kāmag bavād!
Col. (K 20)
frazaft. frazāmēnīd ēn mādayān Jōšt ī Fryān abāg ēn Ardā Virāz andar rōz ī rašn ud māh ī day, sāl ī šašsad navad yazdegirdīg. man dēnbannag hērbedzād Mihrābān Kayhusrav ī Mihrābān ī Spendyād ī Mihrābān ī Marzbān az dastnibēg ī hērbed Mihrpanāhag ī Srōšiyār ī Vēšābūr ī hērbed nibišt.
ped yazdān kām bavād!
Col. (M 51 b)
frazaft frazāmēnīd ēn Ardā Virāz ud ēn madayān ī Jōšt ī Fryān andar rōz ī fravardīn māh vahman sāl ī haftsad ud šast-šaš Yazdegird šāhān šāh ī Ohrmazdān. man dēn bannag hērbedzādag avestād Pešōtan ī Rām ī Kāmdēn ī Šahriyār ī Neryōsang ī Šāhemard ī Šahrayyār ī Bahrām ī mōbed Hormazdiyār ī hērbed Rāmiyār az dastnibēg ī hērbed Rustahm Mihrābān nibišt.
ped yazdān kāmag bavād!
ud az šahrestān ī Bharuc.
Col. (SP 33)
frazaft frazāmēnīd ēn mādayān ī Jōšt ī Fryān abāg Ardā Virāz andar rōz ādur yazd ud māh day ud sāl ēk hazār ud sad ud se yazdegirdīg. an dēn bannag hērbedzād Kāvus (Kayus) pus ī Frēdōn pus ī dastvar Vahman az dastnibēg nibišt.
ped yazdān kām bād!
Made with Bullet